Name:                     Kai
Geboren:                13.10.2023
Rasse:                    Whippet
Geschlecht:           Rüde kastriert
Grösse:                   47 cm

10. Januar 2025 Vorstellung von Kai :
Kai und sein Bruder Flo wurden von einem Jäger einer spanischen Tierschützerin übergeben. Nun werden die Beiden für die Reise in die Schweiz vorbereitet und können ab März bei uns kennengelernt werden.


Falls Sie Kai kennenlernen möchten und ihm ein passendes Zuhause geben könnten, verlangen Sie bitte unser unverbindliches Bewerbungsformular: Tel. 0041 32 462 3219 (falls Anrufbeantworter, bitte Meldung hinterlassen, wir rufen gerne zurück) oder per Mail: info@grisette.ch.
Kai ist geimpft, gechippt, auf Mittelmeerkrankheiten getestet und wird bei der Einreise durch uns verzollt. Er wird mit Schutzvertrag gegen eine Schutzgebühr von SFr. 600.-- nach vorheriger Platzvorkontrolle vermittelt.

06. März 2025 Kai ist angekommen :
Am Samstag sind Kai, Flo und Aluna gut bei uns im Jura angekommen. Kai ist wie sein Bruder Flo sehr freundlich und verträglich:


Kai durfte am Sonntag weiterreisen auf seine Pflegestelle in Jona SG. Dort lebt er unter anderem auch mit Kindern zusammen und bis jetzt gibts nur Gutes zu berichten.


24. März 2025 Erster Bericht von Kais Pflegefrauchen :
06.03.25:
Liebi Sandra und zwei und Vierbeiner   
Da mal en erste Bricht vo eus. Er isch soo en wundervolle Hund sehr agnehm und null ufdringlich. 
No zimli unsicher und er wird glaub ich au nie en Draufgänger werde, wird aber sicher mit entsprächend Ziit und Geduld no uftaue. 
I de Wohnig isch er super agnehm, lid i sine Chörbli und chunnt immer wieder cho luege wo mir sind und wädlet denn au freudig mit em Schwanz. Au wenn mir am ässe sind, lid er problemlos is Chörbli und döset e chli. Er selber hed am Morge schinbar nöd so Hunger, lat immer d Hälfti stah, defür darfs denn am Abig e gueti Portion si. 
Er isch stuberein und hed vo de erste Nacht a dure gschlafe. Us de Wohnig use ga hed  er bisher nöd so toll gfunde, ich glaube, dass ihn s Auto fahre stresst, und er, wenn mir use sind, angst gha hed, dass er is Auto mues (obwohl er super ruhig im Auto mitfahrt) und drum bitz blockiert gsi isch. Vorher isch er jetzt zum erste Mal vo selber us de Türe use und di erst Stäge abegloffe, chunnt also guet und das mit em Auto fahre bringed mir au no here.. 


Er lauft sehr agnehm a de Leine und zeigt sich bisher nöd sehr jagig. D Chatz wo ihm quasi vor de Nase dure isch, hed ihn nöd interessiert, einzig d Chräie uf em Fäld luegt er ab und zue mal mit ufgstellte Ohre a. 
Anderi Hünd findet er eher nöd so interessant und macht en Boge um sie. Defür schnüfflet er gern mal a de Zweibeiner wo a eus verbi laufed. 
De Zug wo a de Hundewiese verbi fahrt, macht ihm nüt us, en Bus oder Lastwage findet er eher chli unghür, reagiert aber nie panisch.
Wo mer amene Traktor mit Ahänger hend müesse uswiche, isch er zimli relaxed eifach i d Wiese gläge, au susch isch er kei Tussi und lid überall gern here (kenn ich vo de Ari her ja gaaar nöd ) 
Au mit de Chind isch er super, de Dylan hed uu freud a ihm und wett ihm immer Gstältli und Leine alege und denn au no grad sälber hebe
 
Ganz liebi Grüess vo eus  
Tanja & Familie 

02. April 2025 Kai – jetzt Jess - En Liebesbrief:
Kai, der jetzt Jess genannt wird, darf für immer auf seiner Pflegestelle bleiben. Wir freuen uns sehr darüber, danke Tanja :
Liebi Sandra  
Sit ich dich und d Hundepension Grisette kenne, träum ich devo en Hund vo dir z ha. 

Afangs 2024 simmer denn wäg ere Galga bi dir uf bsuech gsi, aber ich ha eifach nid us vollem Herz chönne ja zunere Adoption säge. 
Churz druf abe hesch mer denn d Emily uf Pflegstell avertrout und so han i Zit gha, de Hund kenne lerne und z luege ob s wür passe, wieder en Hund z ha. Es hed denn eifach nöd ganz passt und drum hed Emily dörfe wiiter zieh, mir hend bis hüt regelmässige Kontakt zäme :) 
So mänge tolle Hund han i gseh cho und ga bi dir und denn isch da plötzlich de Post uf Facebook- zwei Whippet Buebe. Mis Herz hed grad en Gump gno und e inneri Stimm hed lut grüeft "de dunkler isch mine!"

Ich ha gseh wie gross d Begeisterig au bi andere Follower isch und wil ich bitz unsicher gsi bin, ob s zu üsem Läbe passt wieder en Hund ha, han i dänkt ich tue eifach mal beobachte. Ich bi immer chli uf de Homepage go luege ob villicht "reserviert" bi ihm staht, aber stattdesse isch de Kai plötzlich Poleposition uf de Homepage gsi und de Flo nöd, also han i eifach nöd anders chönne als dich z froge, ob du e Pflegstell für ihn chönntisch bruuche. E Wuche später isch de Kai i de Schwiz acho und ich ha nach 24 Jahr ohni Whippet, wieder eine bi mir gha. Uf em Heiwäg sind d Freudeträne nur so gflosse.. 

Ich ha s Glück gha, mini ganz Chindheit mit ere wunderbare Whippet Fründin z verbringe, wo sie denn gstorbe isch und ich kein eigne Hund ha chönne ha, isch für mich klar gsi, dass ich au witerhin mit Windhünd wett z tue ha und so han i bi ere andere Windhundorganisation d Galgos kenne glernt und mis Herz a d Spanier verlore. 
Für mich isch klar gsi, dass wenn i mal en Hund ha, denn us em Tierschutz. 
Es paar Jahr später isch es denn so wiit gsi und d Ari (en Ratonero) isch zu mir cho. Zwölf Jahr isch sie mini Begleiterin gsi und hed mich glehrt, was es heisst, en Hund mit Vergangeheit z ha. 

I dere Ziit han i dich kenne glernt und de eint oder ander Galgo dörfe vom Flughafe für dich go abhole, das sind immer ganz bsundrigi Fahrte gsi . Mir isch immer klar gsi, dass wenn ich nach de Ari nomal en Hund ha, denn eine vo dir. Dass das en Whippet wird si, hätt i mer allerdings nie la erträume, die gits ja nöd grad wie Sand am Meer
 
Woni die Stimm ghört ha, dass de dunkel mine isch, han i dänkt, denn mues i no en Name für de Hund ha und im gliche Momänt isch mer "Jess" dur de Chopf. So hed de Vater vo eusere erste Whippet Hündin gheisse. Woni denn no d Bedütig vo dem Name bi go google, han i gwüsst, dass das de richtig Name isch. 
Jess bedütet Geschenk Gottes. 
 
 
Liebste Jess   
Du bisch wahrlich es Gschänk vo Gott. 
Mis Herz isch voll mit so vielne schöne Erinnerige a eusi Whippet wo mir gha hend und sit du bi eus bisch, sind all die Erinnerige wieder so lebändig. Ich stah jede Morge mit emene Lächle uf, eifach wil du da bisch und so oft lueg ich dich a und gnüsses , wil alles so vertrout isch. Wie du laufsch, wie du luegsch, wie dini Ohre sind, wie du ligsch, wie du rennsch, - eifach alles. Es isch so, als ob du scho immer da gsi wärsch und s die viele Jahr zwüsched eusne Hünd und dir nie ge hätt.. 
Gott verspricht eus, dass er eus alles zrugg git, wo eus gno worde isch und genau das erläb ich mit dir
Mir zwei hend vom erste Tag a es bsundrigs Band zwüsched eus. Wo ich bin, dert bisch du au, ohni dass jemals ufdringlich wärsch. 
Ich weiss ich chan dir vertroue, wenn de Dylan i dinere Nächi isch und das isch unbezahlbar. 
Dass ich das mine Chind cha wiiter ge, mit emene Whippet- Fründ wie dir ufwachse, übertrifft alles, woni mit je hätt chönne erträume. 
Erst grad chürzlich han i neume gläse „a home without a dog is just a house“ und so isch es. 
Du bisch euses Tüpfli uf em i ️
 
Danke Sandra, für dis Vertroue und dini unschätzbar wertvolli Arbeit
Danke Jess, für dini Liebi
Danke himmlische Papi für die Gebättserhörig   
 
Tanja und Familie